Fshati Negroc bëhet me xhami të re
Prishtinë, më 29 gusht 2025
Besimtarët e fshatit Negroc të Drenasit sot u bënë me xhami të re. Ata, nën këndimin e tekbireve dhe me lexim Kurani, përuruan xhaminë e ndërtuar nga shoqata “Joud” e Kuvajtit, me donator Naser Ibrahim Naser el Hajri.
Në fjalën e tij përshëndetëse drejtuar të pranishmëve, kryeimami i Kosovës, Vedat ef. Sahiti, pas urimeve për banorët për hapjen e kësaj xhamie, falënderoi mysafirët nga Kuvajti për donacionin, duke potencuar se aty ku ka minare zbret mirësia, zbresin mëshira dhe begatitë e pafundme. Ai tha se populli ynë, gjithmonë do të jetë mirënjohës ndaj shtetit dhe popullit të Kuvajtit.
Dr. Rashed el Axhmi nga shoqata “Joud”, tha se sot, një ëndërr të kahmotshme po e bëjmë realitet. Ai evokoi kujtime kur bashkë me përfaqësuesit e Bashkësisë Islame të Kosovës kishin biseduar për ndërtimin e kësaj xhamie në këtë fshat.
Ndërkohë kryetari i Këshillit të BI-së së Drenasit, Valon ef. Bequku, falënderoi donatorët, duke e cilësuar këtë si një vepër simbol të besimit.
Në fund të programit, besimtarët falën edhe namazin e parë të xhumasë, hytben e së cilit e mbajti kryeimami i Bashkësisë Islame të Kosovës, Vedat ef. Sahiti.
Ndërtimi i kësaj xhamie nuk simbolizon vetëm ndërtimin e një objekti kulti, por ringjalljen e jetës fetare dhe shpirtërore në këtë komunitet.
